Sixty Years!! Long Live Violations!!

ستين خيبة

لا زالت الدول بتحتفل بذكرى مرور 60 سنة على صدور الميثاق العالمي لحقوق الانسان - واللي كان صدورو بتاريخ 10 كانون الثاني 1948

ما بعرف شو الفايدة من هالاحتفالات في ظل انتهاكات صارخة لحقوق الانسان على مستوى دول العالم عامة وبعض الدول المحتلة واللي قائم فيها حروب زي العراق وفلسطين بشكل خاص

وازا كان انتهاك حقوق الانسان على جميع المستويات بيحصل في العراق وفلسطين وبلاد الكونغو وغيرها – ومش قصدي التقليل من فظاعة هاي الانتهاكات - الا انو انتهاك حقوق المرأة مستمر توينتي فور سيفن في جميع بلاد العالم، حتى المتقدمة منها



وللأسف ما في بلد من بلاد العالم الا وفيه انتهاك لحقوق النساء سواء في شأن واحد أو في شؤون مختلفة، فإما إفراط وتفريط في قوانين وضعية، أو تشديد وتضييق في تعاليم الدين

ستين "خيبة" مرت على صدور الاعلان العالمي لحقوق الانسان بس للأسف لا زالت حقوق المرأة بتحتل المرتبة الأخيرة او ما قبل الأخيرة على اجندة الكثير من الدول

وازا ما كانت من ضمن الأولويات الأخيرة على الأجندة بتلاقي انو العمل على دعم المرأة بيتم في خطوات تكاد تكون السلحفاة أسرع في العمل عليها مما بتعمل الدول والمنظمات

أو زي ما هو حال العديد من الدول اللي حقوق المرأة فيها بتكون مجرد حبر على ورق لأنها لسة بتعتبر المرأة مخلوق من الدرجة الثانية أو انها مقتنعة انو حال المرأة عندها هو الحال اللي ارادو الإسلام إلها

حقوق المرأة –للأسف- هي حقوق بنّادي فيها وبندعوا الها عشان نبيّن متحضرين ومتقدمين، بس وقت التطبيق الأغلبية من الرجال بتبلع كلامها و-على رأي المثل- بتحط راسها مع الروس وبتمشي مع حكم المجتمع وثقافتو وعاداتو وتقاليدو المتخلفة عن المرأة

ستين سنة أشبه بستين مليون خيبة، لأنو الدول والحكومات خلال هالستين سنة ما دعمت المرأة زي ما كان المفروض تدعمها حتى تسير مع الرجل في نفس المسار بدل ما تضل متأخرة لحتى هاي اللحظة ولا زالت للأسف عاجزة عن اللحاق بالركب لمجرد عدم تقبل المجتمع الها كانسان مكافىء للرجل ومساوي الو (أما المساواة ف رح اتركها هلأ وبحكي عنها في إنتري تاني ان شاء الله)0

ولو بدي ألوم على اصحاب الستين خيبة – الغرب وميثاقهم والعالم اجمع وتبعيّتو الهم - ف ما بقدر الوم عليهم اكثر مما رح الوم علينا كمسلمين

لأنو بالنسبة للمسلمين الميثاق العالمي لحقوق الانسان صدر قبل ما يقارب 1400 سنة في عهد الرسول صلى الله عليه وسلم ف الستين سنة لميثاق وضعي لا تعتبر شيء مقابل 1400 سنة لميثاق من عند رب العالمين



مقارنة بسيطة بين حقوق المرأة حاليا في مجتمعاتنا وبين حقوق المرأة في عهد الرسول عليه الصلاة والسلام وصحابتو كافية تبيّنلنا الانتهاكات الواضحة لحقوق النساء في عصرنا الحالي

قبل الاسلام ما كان للمرأة شأن يذكر، وما بدي اخوض في هاي المرحلة لأنو بيتهيألي كلنا عارفين سوادها وظلمتها

بعدين اجى الإسلام فأعلى شأن المرأة واعطاها حقوقها وكرّمها ورفع مكانتها

والعجيب جدا انو هاي الجملة عادة بتكون الجملة الإفتتاحية ل اللي بدو يحكي عن حقوق المرأة في الإسلام بس لما تقارنها مع وضع المرأة المسلمة بتلاقي انو في الواقع الحالي المرأة مهضومة الحقوق مضهدة الجانب ومستوطيين حيطتها بإسم الإسلام والإسلام براء من هاي الممارسات المتخلفة وبتلاقي انها يا دوب ا حاصلة على 25% من حقوقها الفعلية في الإسلام

لو رجعنا لحال المرأة في عهد الرسول صلى الله عليه وسلم وصحابتو من بعدو –وحتى في الديانات السماوية السابقة- رح نلاقي انها شاركت في شتى مجالات الحياة ولوجدناها جنبا الى جنب مع الرجل

هادا ازا ما تقدمت على الرجال في بعض الأحيان بعلمها وحكمتها وفطنتها وشجاعتها

فعن الرسول صلى الله عليه وسلم أنه قال: النساء شقائق الرجال

ومع هيك هينا بعد 1400 سنة على هالاعلان وما زلنا بنميّز ضد المرأة، لمجرد انها انثى، تحيض وتحمل وتلد

اختزلنا المرأة ودورها في الحياة ضمن اطار "موذرهوود" وأهملنا أي شيء آخر ضمن مصطلح "وومان هوود" لمجرد انّا مش مستوعبين نشوفها بتقوم بأي دور آخر الى جانب دورها كأم

بعد 1400 سنة من الإعلان العالمي الحقيقي لحقوق المرأة وحقوق الإنسان ولساتنا مش فاهمين انو المرأة انسان كامل الأهلية تماما كما الرجل



أي حديث بعد هادا بنستنى عشان نفهم ونبطل تمييز ضد النساء نفسي أفهم

المرأة في عهد الرسول صلى الله عليه وسلم كانت تخوض شتى مجالات الحياة وتمارس الأعمال كافة بدون ما حدى يحكيلها لأ انتي "مرة" أو "حرمة" أو "ست" أو أي من المصطلحات اللي على هالشاكلة

المرأة في الدين الاسلامي كانت تعمل داخل البيت وخارجو، سواء كانت ام او زوجة او بنت

هاجرت المرأة الى الحبشة وما حدى حكالها ارجعي انتِ امرأة

هاجرت المرأة –عزباء ومتزوجة- الى المدينة لبناء الدولة الاسلامية الأولى وما حدى حكالها ارجعي انتِ امرأة

حملت اسماء بنت ابو بكر - ذات النطاقين - الطعام والسقاية للرسول عليه السلام وصاحبه - ابوها ابو بكر - في رحلة الهجرة ولم تسمع مقولة انتي امرأة

كانت النساء في عهد الرسول عليه الصلاة والسلام بيشهدوا صلاة الفجر وبيحضروا مجالس التعليم والعبادة وعن عائشة انها قالت – بما معناه - رحم الله نساء الأنصار لم يمنعهن الحياء أن يتفقهن في الدين

كانت النساء بتخرج مع الرسول عليه الصلاة والسلام في الغزوات

فمثلا أم عمارة الأنصارية شاركت في القتال يوم أحد وأثنى عليها النبي صلى الله عليه وسلم

وفي حروب الردة شهدت المعارك بنفسها ولما قتل مسيلمة الكذاب رجعت وفيها 10 جروح

أم عمارة نسيبة المازنية تقول غزوت مع الرسول 7 غزوات

ام حرام بنت ملحان طلبت من الرسول ان تركب البحر وشاركت في فتح قبرص (ذات الصواري) والها مسجد هناك

وأم سليم بنت ملحان كان معها خنجر يوم حنين فشافها زوجها وشافها رسول الله عليه الصلاة والسلام فسألها فقالت انها اتخذت الخنجر عشان اذا اقترب منها احد من المشركين تشق بطنو بالخنجر فضحك عليه الصلاة والسلام لما سمعها والحديث في صحيح مسلم

شاركت عائشة وأم سليم يوم أحد وفي الرواية ان الرسول عليه الصلاة والسلام شافها بتحمل القرب على ظهرها لسقاية المسلمين ونفس الشي شاف أم سليم بتحمل القرب على ظهرها وبتسقي الماء في أفواه المسلمين

غزا الرسول عليه السلام ومعه ام سليم ونسوة من الأنصار فكانت النساء بتداوي الجرحى وبتسقي الماء للمحارم والأزواج أما غير المحارم فالمداواة حسب الحاجة وحسب الضابط الشرعي – يعني بدون "لمس" الا حسب الحاجة - وهو نفس الضابط الشرعي لو اراد رجل مداواة امرأة

غرف أمهات المؤمنين كانت مفتوحة على المسجد – وما كان المسجد للعبادة بس

فمثلا كان الحبشة بيلعبوا بالسيف في المسجد وعائشة متكئة على كتف النبي عليه السلام

وكانت الإجتماعات تعقد في المسجد وتستقبل فيه الوفود – وبالتالي النساء ما كانوا عايشين في عزلة عن المجتمع زي ما بنحاول نحبسها في بيتها هاي الأيام بحجة "وقرن في بيوتكن" 0

شاركت المرأة في الحياة السياسية في الإسلام فتمت مبايعة النساء على كل ما بايع الرسول عليه السلام عليه الرجال في بيعة العقبة وفي بيعة الرضوان تحت الشجرة - طبعا مع التزام الضابط الشرعي – بدون مصافحة النساء

ومن هديه عليه الصلاة والسلام انه سمع مشورة امرأة - أم سلمة – لما أشارت عليه انو يتحلل من احرامو بإنو "ينادي حلاقو ويحلق بعدين يذبح الهدي"، وكذلك فعل، هادا في الوقت اللي ما حدا من الرجال من صحابتو عليه السلام سمع أمرو لما أمرهم 3 مرات انهم يتحللوا من إحرامهم على أساس يرجعوا السنة الجاية

أول من لجأ اليه الرسول عليه الصلاة والسلام بعد نزول الوحي كانت امرأة – زوجته خديجة

أول من آمن بالرسول عليه الصلاة والسلام كانت امرأة

وأول من ساند الرسول عليه السلام بالمال والتأييد كانت امرأة

كانت خديجة بتحمل الطعام لزوجها عليه الصلاة والسلام وهو يتعبد في الغار – وهي امرأة

أول شهيد في الإسلام كان امرأة – أم عمار نسيبة بنت كعب

لما مرض علي السلام في مرضه اللي توفاه الله فيه استأذن جميع نساؤه حتى يُمّرّض في بيت عائشة – فهل كان استئذانو من نساؤه عبثا ولا في حكمة بالموضوع؟

ولما توفي عليه الصلاة والسلام توفي في حضن عائشة رضي الله عنها بين سحرها ونحرها – وهي امرأة

قدم القرآن ذكر الأنثى على الذكر في الهبات "يهب لمن يشاء اناثا ويهب لمن يشاء الذكور" وبين الاسلام مقدار الأجر العظيم للأب الذي يلي من أمر البنات شيئا

كل هدول صدف ولا عبث؟ ولا يا ترى في حكمة بالموضوع؟

روت النساء الأحاديث عن الرسول صلى الله عليه وسلم ولم يرو عن أي من الرجال في الصحيح أكثر مما روي عن عائشة رضي الله عنها إلا عن عبد الله بن عمر وأبو هريرة

النساء ما كذبت قط على رسول الله عليه الصلاة والسلام في رواية الأحاديث بينما كذب العديد من الرجال

كانت عائشة من أعلم الناس وأكثرهم معرفة بشعر العرب وطبعا هي تزوجت عن 9 سنين وبالتالي فهي تعلمت الشعر في بيت البنوة لأنو بيت أدب وشعر

حتى انو عائشة كانت أعلم من رجال كتار وقيل انو لو جمعنا علم عائشة الى علم جميع امهات المؤمنين وعلم جميع النساء لكان علمها أفضل

لما سألوه عليه الصلاو والسلام عن أحب الناس اليه قال "عائشة" وما استحى من ذكر اسمها ولا استحى - عليه الصلاة والسلام - انو يحكي عن حبو لزوجتو أمام الرجال

في الحديث النبوي: "قالت النساء للنبي : غلبنا عليك الرجال فاجعل لنا يوما من نفسك, فوعدهن يوما لقيهن فيه فوعظهن وأمرهن" الرسول صلى الله عليه وسلم يستجيب لمطالب النساء؟؟ وين احنا من هالحكي وليش طلبات النساء مهملة؟ على الأقل اللي ما خرج منها عن نص الشارع في القرآن والسنة النبوية الشريفة؟؟

وفي الحديث النبوي عن أم عمارة الأنصارية جاءت الى النبي صلى الله عليه وسلم فقالت:ما أرى كل شيء إلا للرجال وما أرى النساء يذكرن بشيء فنزلت الآية: إن المسلمين والمسلمات والمؤمنين والمؤمنات والقانتين والقانتات والصادقين والصادقات والصابرين والصابرات والخاشعين والخاشعات والمتصدقين والمتصدقات والصائمين والصائمات والحافظين فروجهم والحافظات والذاكرين الله كثيرا والذاكرات أعد الله لهم مغفرة واجرا عظيما – الأحزاب 35

سبحان اللهّ إمرأة بتسأل عن حقوق المرأة والرسول عليه السلام ما بيعترض على سؤالها والله تعالى بيجياوب طلبها ويؤكد حقوق النساء؟؟

وين اللي بينكروا حقوق المرأة من هادا الحكي وشو الإسلام اللي بيتبعوه لما بينكروا على المرأة اللي بتطالب بحقوقها في الإسلام مطالبها؟

قال عمر بن الخطاب رضي الله عنه كنا في الجاهلية لا نعد للنساء امرا حتى انزل الله فيهن ما انزل وقسم لهن ما قسم
وفي رواية تانية قال كنا في الجاهلية لا نعد النساء شيئا فلما جاء الاسلام وذكرهن الله رأينا لهن بذلك حق علينا

اصطفى الله من النساء كما اصطفى من الرجال قال تعالى: إن الله اصطفى آدم ونوحا وآل ابراهيم وآل عمران على العالمين، ذرية بعضها من بعض والله سميع عليم

وقال تعالى: وإذ قالت الملائكة يا مريم إن الله اصطفاك وطهرك واصطفاك على نساء العالمين

في الجاهلية كانوا يدفنوا البنت حية فحرّم الإسلام وأد البنات فامتثل الناس للأمر مباشرة ونفضوا عنهم غبار الجاهلية وثقافتها المسيئة وامتثلوا لتنفيذ أمر الرسول بمجرد سماعهم لأمرو عليه الصلاة والسلام

أما احنا فتعدينا الجاهلية وسبقناها فصرنا نمن على المرأة بالحياة في الوقت اللي وأدناها فيه وأد معنوي وصارت كل خياراتها وقراراتها بإيد الرجال من أقاربها

وما نسيوا يعطوها الخيار الوحيد – الطاعة الطاعة الطاعة




وازا ما اطاعت في حق اختيار الها منحها اياه الدين فبنرفعلها العصا، والعصا بتختلف باختلاف وضعها الإجتماعي

فإما عصا الولي سواء أب أو أخ أوعم أو غيرو من الأقارب أو عصا القوامة ازا كانت متزوجة

وبين العصاتين بنلوّح بانها ناقصة عقل ودين أو بانو شهادة الرجل بامرأتين أو غيرو من الأحاديث اللي وضعناها في غير محلها كسياط عشان نجلد فيها النساء

متناسيين في نفس الوقت انو خيركم خيركم لأهله وانا خيركم لأهلي

ومتناسين انو النساء شقائق الرجال

ومتناسيين رفقا بالقوارير

أما حديث ليسوا أولئك بخياركم فكأنو الرجال ما عمرهم سمعوا فيه


ستين سنة -والأصح 1400 سنة- على الإعلان العالمي لحقوق الإنسان واحنا لساتنا مش قادرين ننفض غبار التخلف عن أنفسنا؟؟

هادا غيض من فيض
والقارىء في كتب السيرة والحديث رح يلاقي التاريخ الإسلامي حافل بمشاركة النساء في الحياة داخل البيت وخارجو

اما ازا بدنا ننهض بالأمة الإسلامية ف ما في نهوض سليم بأجيال المستقبل بدون النهوض بالنص الأهم من المجتمع - المرأة - ولا في نهوض بدون اعطاءها حقوقها كاملة



لأنو ازا بدنا نطالبها بواجبها وعشان تؤديه بشكل صحيح لازم أول نعطيها حقوقها

لأنو ما بصير نطالب الفرد –أي فرد - بإنو يعمل واجبو بدون ما نعطيه حقو اول

Read more...

The 60th Anniversary of the Universal Declaration of Human Rights

People at the Human Rights Square next to the Eiffel Tower in Paris during a ceremony commemorating the 60th anniversary of the Universal Declaration of Human Rights.



Another march to mark International Human Rights Day was held in the Nicaraguan capital, Managua where a girl runs by a mural that reads in Spanish "Eradicate hunger and poverty".

Source

Read more...

A Closer Look at Violence in Our Societies

العنف في مجتمعاتنا -- مسلسل مستمر

مش من الخلق منازلة عدو أعزل حتى وان كان رجل
بالإضافة الى انو تعاليم ديننا كمسلمين بتنهى عن قتل المرأة والطفل والشيخ حتى لو في حالة الحرب

والموضوع ما بيتوقف عند هيك، بل انو احنا منهيين عن قطع الشجر او التخريب حتى في حالة الحرب

فما بالنا في حالة السلم؟؟ وما بالنا ازا كان الأشخاص من نفس أهل البيت؟؟

مش من الخلق كمان في حالة حوار او نقاش عادي عن اي موضوع بين طرفين او شخصيتين "عامتين او عاميتين" انو يبدأ واحد منهم برفع الصوت أو إطلاق الشتائم والألقاب على الطرف التاني، وما اعتقد انو في اختلاف بيننا على انو اللي بيعمل هيك هو الطرف الأضعف حجة، أو انو الأضعف قدرة على ايصال حجتو للطرف التاني واقناعو فيها

أما ازا كان هاد هو اسلوب الشخص اياه دايما في كل حوار او نقاش بيدخل فيه، معناتو الموضوع بيتعدى ضعف الحجة والبرهان الى خلل في شخصية وسلوك هاد البني آدم بحيث انو بيلجأ الى رفع الصوت و/او السب و/او الشتم في حالة عجزو عن التعبير عن وجهة نظرو بشكل مقنع للطرف الآخر، حتى انو البعض منّا ممكن يحكي عنو شخص همجي أو بدائي لا يصلح الحوار معو ولا المناقشة


فما بالنا ازا كان النقاش حاصل بين طرفين من نفس البيت؟ وما بالنا ازا كان الموضوع بيتعدى رفع الصوت والشتم والسب الى الضرب باليد والركل بالقدم واستخدام ادوات لتأديب أو الأصح لتعذيب الطرف التاني حتى يقتنع بوجهة نظرنا ورأينا أو يسمع كلامنا؟؟

المفروض ما في بينّا اختلاف على انو استخدام العنف لحل اي خلاف او مشكلة مرفوض كمبدأ
العنف لازم يكون مرفوض في اي حالة ولأي غرض كان، وضد مين ما كان.. سواء كان ضد رجل أو امرأة أو طفل

اوكي في حالات لنساء بتعنّف رجالها، اكيد سمعنا عن بعض هاي الحالات، الا انو الظاهرة الأكتر انتشار على نطاق عالمي هي استخدام العنف ضد النساء والأطفال

وفي الوقت اللي بينهى الاسلام فيه عن ضرب المرأة، واكتر من هيك، في الوقت اللي حضنا الاسلام على الرفق بالقوارير، الا انو ظاهرة استخدام العنف ضد المرأة هي احدى الظواهر الأكتر انتشارا في مجتمعاتنا

هاد عدا عن انو ضرب المرأة الحاصل في الوقت الحالي ما الو دخل بتعريف الإسلام ل "ضرب المرأة في حالة النشوز" لا من قريب ولا من بعيد

وعدا عن انو الاسلام ما اباح الضرب - حتى حسب تعريف الضرب في الاسلام - الا في حالات محددة، وما لازم ننسى انو صلى الله عليه وسلم اضاف في الحديث النبوي: ليس أولئك بخياركم


نرجع للموضوع.. 0

العنف، كظاهرة، منتشر وموجود في مجتمعنا بشكل كبير ولافت للنظر.. حتى انو خلال الأيام القليلة الماضية اطلت علينا اكتر من حالة عنف ومشاجرات في الجامعات الأردينة واللي يفترض انها ارقى منابر للحوار والتعلم والتعليم، ف ازا كان هاد حال المتعلم في مجتمعنا، فما بالنا بغير المتعلمين من باقي المجتمع؟؟

ازا كان هاد حال طلاب متعلمين ومتكافئين في القوة الجسمية، فما بالنا ازا كان الممارس للعنف هو الرجل والطرف المعنّف هو الطرف الأضعف جسما كالزوجة و/أو الأطفال؟؟


وما بالنا ازا كان الرجل بيستخدم العنف لحل كل حالات النقاش والحوار مع اهل بيتو؟؟ ما بالنا ازا صار استخدام العنف عادة دائمة عند هاد الزلمة حتى يقنع اهلو بكلامو؟؟

ما في شك انو هيك "زلمة" بيعاني من خلل أو ضعف في الشخصية والسلوك بتخليه يلجأ لاستخدام العنف ليحصل على مبتغاه ويحقق مرادو على اعتبار انو وجهة نظرو هي وجهة النظر الوحيدة الصحيحة

وازا بتسأل هاد الشخض المريض ليه بيلجأ لاستخدام العنف رح تسمع اجوبة غريبة عجيبة ما الها علاقل بالمنطق السليم


فمثلا ممكن يحكيلك انو "المرة" هي اللي طلّعتو من طورو
أو انها عنيدة ومش راضية تفهم كلامو
أو انو بغير هيك "المرة" ما بتفهم ولا بتقتنع
والتبرير نفسو هاد بينطبق على حالة الأولاد كمان

ونظرا لصعوبة الظروف ممكن المرأة تفقد ثقتها في نفسها زي ما هو فعليا حاصل في الواقع، وبتصير تصدق هالحكي الفاضي وانها كائن بشري من الدرجة الثانية بعد الرجل، وانها فعلا هي السبب في غضب الزوج وفقدانو لسيطرتو على سلوكو

وبتستمر في السكوت متناسية انو لما ابنها بيشوفها بتنضرب قدام عينو رح يقل احترامو الها

طبعا هاد الزوج المريض نفسيا والفاقد للتحكم بسلوكه في حالة الغضب أو الانهزام في النقاش مستعد يعطينا العديد من الأسباب اللي بيلقي فيها اللوم على المرأة والأطفال عشان يبرر سلوكه الخاطىء ومرضو النفسي


حتى ما رح نلاقي انو عندو ادنى استعداد للإعتراف بانو بيعاني من مشكلة عدم التحكم في سلوكه
حتى انو للأسف في اغلب الحالات بيكون مقتنع مليون بالمية بالأسباب والتبريرات الزائفة لسلوكو وهمجيتو

وعلى الغالب التبرير الغالب لسلوكو في هيك حالات بيكون اما نابع من الفهم الخاطى لآية "واضربوهن" 0
او من مشاهدات وممارسات لمسها في سلوك ابوه معو ومع وامو واخوتو اولاد وبنات واستقرت في نفسيتو وعقلو الباطن

لو اخدنا نظرة سريعة على الاحصائيات اللي بتحكي عن حالات العنف الأسري في مجتمعنا رح نلاحظ انها ظاهرة منتشرة وبكثرة
فمثلا في خبر قرأتو في جريدة الغد خليني اقتبس الجزء التالي

وأظهرت أرقام إدارة حماية الأسرة أن مجموع قضايا الاعتداءات الجنسية والجسدية الواقعة على الإناث والتي تعاملت معها ادارة حماية الأسرة للأعوام (2003- 30 /6 /2008 ) 2950 حالة ،تفاوتت ما بين 340 إلى 395 سنويا للأعوام 2003 ولغاية 2006 فيما بلغت 911 حالة في عام 2007 ووصلت حتى حزيران 2008 إلى 530 وتنوعت القضايا من إيذاء جسدي، وفعل مناف للحياء ومواقعه أنثى، وهتك العرض، وشروع بالاغتصاب، واغتصاب

سورس

الواضح انو الأرقام في ازدياد، عالأقل حتى نهاية عام 2007

الا انو في عام 2008 من بدايتو حتى شهر ستة وصل العدد الى 530 حالة حسب ما بيحكي الخبر أعلاه

الا انو طلع خبر تاني بيؤكد انو حالات العنف الأسري في ازدياد، وبرضو خليني اقتبس من الخبر الجزء التالي

عمان- خلف الطاهات - كشف مدير ادارة حماية الاسرة في مديرية الامن العام العقيد محمد الزعبي ان اقسام الادارة تعاملت خلال الشهور العشرة الماضية مع نحو 3640 قضية تتصل بالاسرة،تم معالجة نحو 2210 قضايا عن طريق مكتب الخدمة الاجتماعية فيما تم تحويل القسم الاخر من القضايا الى القضاء والحكام الاداريين

سورس


على كل حال الخبر بيشير الى عدد الحالات اللي تعاملو معها بشكل عام بدون تحديد لعدد حالات الاعتداءات الجنسية او الجسدية اللي وقعت على الإناث
الا انو ما بنقدر ننكر انو الأرقام في ازدياد بشكل عام خاصة من الخبر الأول، وازا كانت وصلت الى 530 حالة لحتى منتصف هاي السنة فهي على الأقل تجاوزت نصف عدد حالات السنة الماضية

طبعا زيادة الأرقام ما بتعني بالضرورة انو الظاهرة اخذه في الازدياد (مع انها ممكن تكون في ازدياد فعلي الا انو ما في داعي لترجيح هيك احتمال حاليا لأنو مش موضوعي هلأ)، باعتقادي المتواضع الزيادة ناتجة عن زيادة الوعي في التبيلغ عن هاي الحالات لا اكتر، لأنو العنف اصلا موجود في مجتمعنا بشكل عميق وراسخ في اذهان الرجال كمبدأ اساسي في التعامل مع المرأة خاصة والأولاد عامة

بس شو السبب وراء انتشار العنف في مجتمع بيتصف انو مجتمع فتي (أغلبه من فئة الأطفال والشباب) زي مجتمعنا؟؟

الموضوع بيبدأ من داخل الأسرة

حديث الأب والأم مع بعضهم بيؤثر في نفسية الأولاد ازا كان حوار غير حضاري بيتخللو رفع الصوت، وبيؤثر بنفسياتهم اكتر ازا حصل سب وشتم خلال الحوار ونفس الشيء ازا انتهى بالضرب والتعذيب وصراخ الأب وبكاء الأم

نفس الشي ازا انتهى حوار بين الأب وابنو او بنتو بالضرب والعقاب الغير مناسب اطلاقا لذنب الطفل لا من حيث حجم الذنب ولا من حيث تناسب العقاب مع عمر الطفل

في هيك حالات جو البيت كلو بيتكهرب ومرة على مرة بتصير الأوضاع تسوء وممكن يكون الضرب خفيف في البداية بعدين يزداد سوء اكتر واكتر

ومن خلال متابعتي في بعض الأحيان لبرنامج الدكتور فِل، خاصة عن المشاكل في داخل الأسرة، احدى البنات (بين 14 -16 سنة اعتقد) كانت بتحكي عن الوضع والخلافات بينها وبين اهلها

كانت بتحكي انو في مرحلة بطلت تقدر فيها تتواصل معهم لأنو ما كان في اسلوب حوار بينهم، وانها صارت تتبنى اسلوب الأب نفسو وتستخدمو معو حتى تورجيه انو طريقتو مش طريقة تواصل ولا حوار...0

المهم بالآخر بتحكي انها صارت لاشعوريا تستخدم هاد الأسلوب لأنو من كتر معايشتو ومن كتر الخلافات صار راسخ في عقلها الباطن

طبعا احنا مجتمعنا بيختلف عن مجتمعهم واسلوب انو البنت ترد على ابوها او اخوها عين بعين وسن بسن هاد مش موجود عنا زي ما هو موجود عندهم


المهم، اللي كنت بدي اوضحو من ال"سيناريو" هو الجزء اللي بيتعلق بانتقال الاسلوب والسلوك نفسو من الأهل الى الأبناء سواء شعوريا او لا شعوريا

في جو اسري مشحون بالخلافات والمشاكل واللي بتنتهي عادة باستخدام العنف مع الطرف الأضعف

بتصير البنت تشوف امها بتنضرب وبتسكت
فتلقائيا بيرسخ في بالها انو السكوت هو رد الفعل المتوقع في هيك حالة

والابن بيشوف إمو بتنضرب وبتسكت وابوه بيعصّب وبيضرب
فتلقائيا بيرسخ في بالو افكار ابوه أو على الأقل سلوكو ويمكن يبدأ بممارسة هيك سلوك على اخواتو البنات خاصة في حالة غياب الاب خارج البيت احيانا

أما ضرب الأولاد انفسهم سواء بنات أو اولاد فعادة بيؤثر في نفسياتهم وسلوكاتهم، حتى انو ممكن يولّد في نفوسهم غضب وكره تجاه الآخرين

بعدين بيكبروا الأولاد وبتيجي مرحلة المراهقة، وعادة بهيك مرحلة لا الأهل بيفهوا على ولادهم وبناتهم ولا الولاد والبنات فاهمين على أهاليهم
وهيك مرحلة عادة بتأدي (تؤدي) لزيادة المشاكل اصلا حتى في حالة وجود اب وأم واعيين ومتفاهمين

فما بالنا والصراع قائم على قدم وساق بين كل الأطراف في البيت؟؟



شوية وفي اقرب فرصة بيزوجوا البنت حتى لو ما انهت تعليمها الأساسي، ومش مهم تكمّل تعليمها او ما تكمّل وعالأغلب بينترك الموضوع لمزاج زوجها

طبعا البنت زغيرة ولسة ما بتفهم اشي بالدنيا، ولا بتعرف تتعامل مع المجتمع الخارجي تعامل سليم لأنها اصلا بهيك عمر بتكون تفكّر تفكير طفولي اكتر من تفكير عاقل

وبعد ما يخلص العسل ازا حصل مشاكل او خلافات بينها وبين زوجها ويمكن لاحقا بوجود طفل او تنين ومع الوقت ممكن ينعاد نفس السيناريو اللي كانت تشوفو بيحصل لما ابوها كان يضرب امها

ف طبعا رح تسكت لأنها كانت تشوف امها بتسكت، أو ازا لجأت لأهلها ف على الأغلب همي ما صدفوا يزوجوها وبالتالي ممكن اكتر اشي يعملولها اياه انو يحكولها ارجعي على بيت زوجك ودبري حالك أو انو ما في بايدنا اشي بنقدر نعملك اياه، ويمكن امها تحكيلها معلش عشان ولادك بدك تتحملي والظروف اصعبة وما في حل ومن هالحكي


اما الولد، سواء تابع تعليمو او ما تابع، بالنهاية رح يتخذ قرار بانو صار وقت يتزوج وينشىء اسرتو الخاصة

وبعد الزواج وبعد ما يخلص العسل ممكن ينعاد نفس السيناريو اللي كان يشوفو لما كان في بيت اهلو

وازا كانت الزوجة جاية من بيت شبيه لحالة بيت اهل زوجها معناتو هي التانية رح تسكت وتتحمل عشان السترة وعشان ولادها أو عشان ما تصير مطلقة وكل هالأعذار السخيفة

طبعا ما في وقت او فترة زمنية محددة بتبدأ فيها المشاكل بين الزوجين، الا انو معروف انو ما في زواج بيخلو من المشاكل بشكل عام
وفي عوامل متعددة ممكن يكونلها دور في زيادة هاي المشاكل او التخفيف منها ومعالجتها بشكل صحيح
وكلو بيعتمد على مدى تفهم الطرفين ومدى رغبتهم في التخفيف من المشاكل أو زيادتها

الا انو العنف ضد المرأة موجود للأسف في كل الطبقات الإجتماعية وحتى في الطبقات الحاصلة على الشهادات الجامعية



الرجل بيمارس العنف، والزوجة بتسكت وبتتحمل.. عشان مجتمع ظالم ما بيرحم الضحية ولا بيتعاطف معها هادا ازا ما شد على ايد المجرم كمان

وهيك بيستمر مسلسل العنف... وبيتقل من جيل للجيل اللي وراه عن طريق ثقافة متخلفة "بتعشش" في النفوس المريضة والمنكوبة

بينما الضحايا بتتساقط يوميا وبتدمي جراحها في صمت مؤلم... على امل انو ينتهي كابوس العنف في القريب العاجل... متناسية انو سكوتها على اللي بيصير معها ما بيزيد المجرم الا اجرام وقسوة وتحجّر، ولا يزيد ابناءها الا معاناة وحزن ومرض

ختام الموضوع رح اقتبسو من جريدة الدستور في واحد من الحوارات مع ضحية معنفة

نسـاء معنفات

كان زوجي يضربني كثيراً ، ولم أكن أعلم عن حماية الأسرة

كان يسكر ويعود ليلا ليضربني

كنت أصطحب أولادي للشارع ، أنام هناك أو على سطح المنزل اوبين السيارات ، ونعود في الصباح

وعندما يسألني أين نمت أخبره بأنني كنت عند أهلي

ويتكرر هذا المشهد يومياً

لكن لم أكن أستطيع اللجوء لأهلي لانني تزوجت به رغماً عنهم ، وهو يكبرني بـ15 سنة. ، وتزوجته وانا في الثامنة عشرة

ما الإساءة التي تعرضت لها؟

كان يحمل عصا ويضربني بقبضة يده على رأسي وكان دائماً يهددني بالقيام بتشويه وجهي

كم عدد أولادك؟

7 أولاد وابنتان

كيف كان شكل العلاقة بينك وبينه؟

مشاكلنا كثيرة ، كنت أغضب منه وأتركه ثم أعود ، ولم أكن أعلم في السابق بأن هناك موانع للحمل ، ووصلت لحماية الأسرة عن طريق ابنتي حورية

هل كان أولادك يشاهدون العنف الذي تتعرضين له؟

نعم كانوا يشاهدون كل شيء ، ولم يستطيعوا عمل شيء

كيف علاقتك به اليوم؟

بيني وبينه المحكمة فنحن نسير بالإجراءات..

وقبل أيام ذهبت معه للمحكمة الشرعية ، فأخبرني انني إذا قمت بالتنازل عن المؤخر فسيقوم بتطليقي

ذهبنا إلى المحكمة وكتب استدعاء بتنازلي عن كل شيء ، ودخلنا على رئيس المحكمة الذي ابلغنا ان الجلسة ستكون بعد شهر

كم ساعدك قسم الارشاد في الجمعية؟

حماية الأسرة اخذوا عليه تعهدا ولكن لم يفد بشيء ، فزوجي لم يتغير

هل أثرت هذه المشاكل على أبنائك في تحصيلهم العلمي ودراستهم ونفسياتهم؟

أبنائي في حالة ضياع بسبب والدهم ، فابني الكبير عمره 24 سنة وأصغر أبنائي عمره ثلاث سنوات ونصف

هل تخرجين بدون علمه؟

قامت جمعية الأسر التنموية بتشغيلي ، وعندما علم زوجي بذلك هددني لكنني لم استمع له

هل وضع زوجك المادي سيىء؟

وضعه المادي جيد لكنه لا يقوم بالصرف على المنزل

كم مضى على زواجك منه؟

24 سنة ولم يتغير شيء فيه

ما دور أهلك؟

أهلي يعاملونني جيدا ، فعندما كنت أتشاجر مع زوجي أذهب للنوم عندهم

والدتي متوفاة ، لذا كنت أذهب لزيارة والدي الذي كان يقوم بإعطائي الدخان لزوجي ومصروفا حتى أقوم بشراء مستلزمات منزلي لإطعام أولادي وزوجي

ماذا عن أهل زوجك ، هل يعلمون بما يقوم به؟

نعم

طلبت الطلاق ، لكن ألم تكوني تعلمين قبل عشر سنوات أن من حقك طلب الطلاق؟

لم أكن أعرف

أين وصلت في الدراسة؟

أنهيت الأول الثانوي وزوجي انهى الثالث الاعدادي ، لكن ابنتي حورية قامت بتعليمي وتفتيح عقلي على امور عديدة لم أكن أعلمها


هل لديك رسالة تريدين إبلاغها للنساء ، لو عدت للخلف ماذا كنت ستفعلين ، وهل ندمت على أمر لم تقومي به أو أمر قمت به

أنا نادمة على كل شيء وما أرغب به أن يصبح زوجي إنسانا جيدا وأن يتعامل معي ومع أولادي بحنان ولطف وأن يدلهم على طريق الخير

فهو يضرب أبنائي وفي احد الايام قام بضرب ابنتي حورية وطردها من البيت الساعة الحادية عشرة ليلا وقال انه لا يريد رؤيتها في البيت ، ولم يكن يعطيها أو يعطي أيا من أبنائي مصروفا للمدرسة ، وكان يشتمهم بأوسخ الشتائم

هل جميع أبنائك في المدارس؟

جميعهم تركوا المدرسة ما عدا ولدين وابنتين ، عندما يكبر الأولاد يقوم بإرسالهم للعمل

سورس

Read more...

Jordanian Human Rights Activist -- Asma Khader

تهنئـــة

أمان - المركز العربي للمصادر والمعلومات حول العنف ضد المرأة

تم اختيار المنسقة العامة للمعهد الأستاذة أسمى خضر من بين 16 إمرأة ناشطة في الدفاع عن حقوق المرأة والمساهمة في الحد من ظاهرة العنف ضد المرأة

Read more...